બ્રાઝિલના ન્યાયાધીશે ગુરુવારે ક્યુપરટિનો સ્થિત એપલને ચાર્જર વિના iPhone વેચવા બદલ $20 મિલિયનનો દંડ ફટકાર્યો હતો. ઉપરાંત, કોર્ટે આઇફોન સાથે ચાર્જર ન આપવાના પગલાને અપમાનજનક પ્રથા ગણાવી હતી. કોર્ટે કહ્યું કે આ પ્રથા ગ્રાહકોને વધારાની પ્રોડક્ટ ખરીદવાની ફરજ પાડે છે. અહેવાલો અનુસાર, કંપની કોર્ટના નિર્ણય સામે અપીલ કરશે. કંપનીનું કહેવું છે કે તે ઇલેક્ટ્રોનિક્સ વેસ્ટ ઘટાડવામાં મદદ કરવા માંગે છે. એટલા માટે તે ચાર્જર નથી આપી રહી.
નોંધનીય છે કે તાજેતરમાં જ બ્રાઝિલના ન્યાય મંત્રાલયે આ જ મુદ્દા પર Apple પર લગભગ $2.5 મિલિયનનો અલગ દંડ લગાવ્યો હતો અને યુએસ ટેક જાયન્ટને તેના iPhone 12 અને 13 મોડલને ચાર્જર વિના વેચવા પર પ્રતિબંધ મૂક્યો હતો. મંત્રાલયે કહ્યું હતું કે બોક્સમાં ચાર્જર ન આપીને એપલ ગ્રાહકોને અધૂરી પ્રોડક્ટ આપી રહી છે.
કંપની ઇલેક્ટ્રોનિક્સ વેસ્ટ ઘટાડવા માંગે છે
નોંધનીય છે કે Appleએ ઓક્ટોબર 2020માં નવા iPhones સાથે ચાર્જર આપવાનું બંધ કરી દીધું હતું. કંપનીનું કહેવું છે કે તે ઇલેક્ટ્રોનિક્સ વેસ્ટ ઘટાડવામાં મદદ કરવા માંગે છે. કંપનીએ દલીલ કરી હતી કે ગ્રાહકો તેમના જૂના ચાર્જરનો ઉપયોગ બોક્સમાં આપવામાં આવેલા કેબલ સાથે કરી શકે છે. જો કે, Apple વૈકલ્પિક રીતે એક અલગ ચાર્જર વેચી રહ્યું છે, જેને ગ્રાહકો વિવિધ ઓનલાઈન અને ઓફલાઈન સ્ટોર્સ દ્વારા ખરીદી શકે છે.
એપલની મુશ્કેલીઓ વધી રહી છે
ફ્રાન્સિસ્કોએ કેલિફોર્નિયા સ્થિત કંપનીને બ્રાઝિલમાં એવા તમામ ગ્રાહકોને ચાર્જર સપ્લાય કરવાનો આદેશ આપ્યો છે જેમણે છેલ્લા બે વર્ષમાં iPhone મોડલ 12 અથવા 13 ખરીદ્યા છે. તેમજ કંપનીને નવી ખરીદી સાથે ચાર્જર સામેલ કરવા માટે કહેવામાં આવ્યું છે. ઘણા દેશોમાં ચાર્જરની ડિલિવરી ન થવાને કારણે Appleને મુશ્કેલીનો સામનો કરવો પડી રહ્યો છે.
યુરોપિયન સંસદમાં કાયદો પસાર થયો
ગયા અઠવાડિયે, યુરોપિયન સંસદે એક કાયદો પસાર કર્યો હતો જેમાં 2024 ના અંતથી તમામ સ્માર્ટફોન, ટેબ્લેટ અને કેમેરાને સિંગલ ચાર્જર સ્ટાન્ડર્ડ તરીકે યુએસબી-સી પોર્ટનો ઉપયોગ કરવાની આવશ્યકતા હતી, જેના કારણે Appleને તેની ફોન ડિઝાઇન બદલવાની ફરજ પડી હતી.